Rawi ne likha hai manzar

Roti theen gale mil mil ke

(Aashoor ki shab oor zainab) x4

1. Piyasoon ki hifazat kerna aey donoon jahan ke malik

Perdesi musafir saare hain tere hawale malik

Kerti theen duaeen rab se roti theen gale mil mil ke

(Aashoor ki shab oor zainab) x4

2. Is shab ki seher jab hogi ujrhe ga nabi ka gulshan

Maidaan mein lahoo uble ga lashoon se bhara hoga ban

Khemoon mein bapa tha matam roti theen gale mil mil ke

(Aashoor ki shab oor zainab) x4

3. Do rooz se band hai paani is dasht mein mehmanoon par

Piyasoon ke galoon ke khatir betaab hain kitne khanjar

Bibi ka ajab tha manzar roti theen gale mil mil ke

(Aashoor ki shab oor zainab) x4

4. Is shab ke pas-e-manzar mein manzar hain shahadat waale

Tarhpein ge zameen ke oppar aagosh ke jo hain paale

Ashkoon ki larhi thi jaari roti theen gale mil mil ke

(Aashoor ki shab oor zainab) x4

5. Kal karb-o-bla ke ban mein akbar ki azaan na hogi

Kal piyaas to rehjae gi aawaz-e-fughaan na hogi

Asghar ho ga na akbar roti theen gale mil mil ke

(Aashoor ki shab oor zainab) x4

6. Parde ka muhafiz ghazi so jae ga kal darya par

Jal jaeen ge kheme saare saadaat ke kal darya par

Ye soch ke hoke muztar roti theen gale mil mil ke

(Aashoor ki shab oor zainab) x4

7. Kal ho ke rasan basta hum zindan ki taraf jaeen ge

Abid ka jale ga bister wo ghash pe ghash khaeen ge

Kal hoon sitaam bachoon par roti theen gale mil mil ke

(Aashoor ki shab oor zainab) x4

8. "Rehan" ajab tha manzar rodad bayaan ho kese

Shabbir jo nikle bahir Kheme ka dia gul kerke

Kanoon mein sada aati thi roti theen gale mil mil ke

(Aashoor ki shab oor zainab) x4