Sajjad audio file

 

Sajjad

 

Sajjad ki ghairat nay daikhay

Kia manzar shaam ki raahon mein

Daikha hai syed zadion ko, bechadar shaam ki raahon mein

 

1.           Gardan ko jhuka kar rota tha Jab daikha saja bazaroon ko

Bazaar mein jab laey zalim be parda parde daaron ko

Abid kay jigar par chalta tha eik khanjar shaam ki raahon mein

 

2.           Purkhaar safar ka gham tha aur na sadma tauq aur beri ka

Eik dard shah-e-mazloom ka tha eik gham tha haram hain be parda

Guzra hai safar beemar ka bus ro ro kar shaam ki raahon mein

 

3.           Durro ki aziyat sehta hai zakhmon say khoon bhi behta hai

Aur shaam kay logon say Abid dil thaam kay bus yeh kehta hai

Main itna sawali hoon day do bus chadar shaam ki rahon mein

 

4.           Sajjad tarap kar kehta tha yeh shaam keh logon say aksar

Aey shaamion itna batlaao kion rehem nahin khatay hum par

Aulad-e-payambar par barsay kion pathar shaam ki rahon mein

 

5.           Nezey pay jo daikha sar sheh ka beemar nay dil ko thaam lia

Farmaya baba daikheay to ummat nay kaisa haal kia

phirta hoon haram ko saath lieay main dar dar shaam ki rahon mein

 

6.           pardes mein apnay shehar ka har ek manzar yaad ajata tha

woh shaan-o-shaukat soch kay hi ankhon say lahu barsata tha

aata tha Madina yaad ussay jab aksar shaam ki raho mein

 

7.           naizo pay saja kar laey thay sar jannat kay sardaron kay

yeh daikh kay bus dil rotay thay Allah-o-Nabi kay piyaron kay

Sajjad kay anson girtay thay khoon banker shaam ki rahon mein

 

8.           Jo dard sahay hain Abid nay tareekh bhulaey gi kion kar

Main daikh raha hoon rahon ko main daikh raha hoon woh manzar

Haan ab bhi wohi bazar sajay hain SAFDAR shaam ki rahon mein