Aun-o-Muhammad audio file

Aun-o-Muhammad

 

Apnay Lahoo ke qatron se

Maqtal mein phool khilaaenge

 

Hum Zainab (sa) kay piyaaray hain, Maa kay raaj dularay hain

Jo hai shahadat ka Quraan hum, us Quraan kay paaray hain

 

Teeron par khainchay gay nishanay, kheliengay talwaaron say

Dada aur nana ki roohein, shaad ho apnay piyaron say

Jurrat-e-Haider (as), Jazbaa-e-Jaffar (as)

Maidan mein dikhlaeengay

 

Maan ki duaein dhaal hamari, Jurrat ki shamsheer hain hum

Jung-e-ohad mein haaranay walon, Hamza ki tasweer hain hum

Kardain gay foujo ka saffaya (2)

Khaibar yaad dilaaeingay

 

Kamsin hain par azm jawaan hai, Ghazi hain shehbaaz hain hum

Sher-e-Khuda kay sher hami hain, Mamu kay jaa baaz hain hum

Abr-e-qayyamat ban ban kar hum

lashkar par chaa jaeingay

 

Shehrag-e-batil kaateingay woh jung karein gay hum dono

Maut ko pehlay maaraeingay tab run mein mareingay hum dono

Baba ka araan rakheingay

Maan ka ehd nibhaeingay

 

Hum bacho ki haibat say tum itna kion ghabraey ho

Jurrat ki har aik ada par, khauf say  kion tharraey ho

Kia hoga mehshar ki tarhan jab

Chotay mamu aaeingay

 

Toot paray faujein bachon par, ran mein do zeeshan girray

Ghoray say do chand girray ya rehl say do Quraan girray

Khoon mein jab doobay to kaha yeh

Maan say duein paaeingay

 

Aun-o-Mohammad (as) ki janib, Abbas (as) chalay Shabbir (as) chalay

Aur udhar dushman ki taraf say, Naizay bhalay teer chalay

Dono mamu soch rahay hain

Kaisay laash uthaeingay

 

Khaimey mein kohraam hua jab phool say laashay laaey gaey

Paani to maujood na tha, laashon par ashk bahaaey gaey

Maan nay magar bacho say kaha hum

Sajdae shukr mein jaaeingay

 

Dil kehta hai mera bhi Nigar aur Hashimi behno ki hai sada

Majlis mein kareingay ceena zani matami dasta bacho ka

Tab Aun o Mohammad Zainab (sa) ko

Haaey bohat yaad aaeingay