Butlao kya iradah hai aye mere mahlaqa

Dust-e-adab ko joor ke bola who ba wafa

Pyasi sakina marti hai ya shah-e-karbala

Guzre hain teen din yohin os khush sifaat per

Gar izn dain hozoor too jaoon furat per

Bole baha ke ashk imam-e falak jinab

Hai maut ka payam yeh bachoon ka izterab

Sabir her ik bala mein hai furzand-e-boo turab

Accha ye hai sallah too kijay talash-e-aab

Mushtaq aap dair se jung-o-jadal ke hain

Pani kahan ka sub ye bahane ajal ke hain

Yaan charh chuke thay ghoray pe abbas-e-haq shinas

Aaye sada bahtiji ki sunte hi dar ke paas

Boli ye mashk de ke sakina ba dard-o-yaas

Qurban ammoo jan bhujado hamari pyaas

Phonkta hai dil utash se kalaija kabab hai

Saqqai kijiye ke yeh kaare sawab hai

Abbas ne kaha ke mera fakhr hai ye kaam

Bibi tumahre baap ka adna hoon mein ghulam

Di tumne aabroo mujhe aye dukhtar-e-imam

Ub hogaya jehan mein bahashti hamara naam

Kausar mein sumjhoon doosh pe gar mushk-e-aab ho

Tum bhi dua karo ke chacha kaamyab ho

Keh kar ye baat baag uthaee samand ki

Soorat badal gayee faras-e sir buland ki

Chal bal hiran ki taiz pari thi parind ki

Surat balain leti thi har jor-o-band ki

Bijli chamak ke chup gai para tarap gaya

Jungal mein yoon ura ke chakara tarap gaya

Markab qadam zamiin pe rakhta tha naz se

Bijli ko khauf kya he nasheb-o-faraz se

Chalakian dikhata tha kya imtiaz se

Urta tha par sada na nikalti thi saaz se

Rakib wo hain jo furq-e-doaalam ke taj hain

Ghora bhi jaanta hai ke nazuk mizaj hain

Woh thootni wo ubli howee ankhrian wo yaal

Goya khule thay hoor ke gaisoo pari ke baal

Woh jild woh dimagh woh sina woh sim woh chaal

Dum mein kabhi huma kabhi zaighum kabhi ghizaal

Wo qasre aasman pe bhi jaane mein taaq tha

Do par bhi gar khuda use deta burraaq tha

Ghore ki yeh shikwah woh shaukat sawaar ki

Tasveer thi hawa pe shahe zulfiqaar ki

Woh shaan woh chamak iilm-e zar nigaar ki

Khurshid ne bhi aankh na shamse se chaar ki

Shamsa na tha nishan-e surayya ma aab ka

Tha farq-e jibraeel pe taaj aftab ka

Allah re jalalat-o-shaukat hozoor ki

Dehshat se uth na sakti thi gardan ghuroor ki

Har ja faras shikwah dikahata tha toor ki

Bijli qadam qadam pe chamakti thi noor ki

Zarron ki zoo se mehr-e-jehan taab zard tha

Mitti mein ye damak thi ke kundan bhi gard tha

Pohncha jo iss jalal se woh aaftab-e-deen

Dekha sipah ko sifat-e-sher-e-khushmageen

Gara jo dabdabe se alam hill gayee zameen

Hut hut ke moorchon se pukare ye ahl-e-keen

Ghazi hai suff shikan hai jari hai dilair hai

Huthta na tha tarai se jo woh sher hai

Gar de ke apne sir ki qasam le na jaate shah

Darya se iss jari ko hata sakti thi sipah

Goya khare thay tegh ba kuf zaighum-e-elah

Kya qaher ki nigah thi allah ki panah

Palkon ki teziyon se kaleje figar thay

Junbish bhawon ki thi ke sarohi ke waar thay

Ye sun ke tahulka suf-e-aada mein pargaya

Toota ye morcha woh risala bigar gaya

Har ghol mein alam se alam jhuk ke lar gaya

Jo rahgaya nishan woh khijalat se gar gaya

Hulchul mein chutkion se jo chille nikal gaye

Iss suf ke teer saham ke uss suf mein chul gaae

Teghen khinchee liye howay bhage jo ahl-e-shur

Kut kar kisi ka hath gira aur kisi ka sir

Talwarian pari thi kisi ki to waan sipar

Burchi thi iss shaqi ki to uss nahas ka jigar

Ye jung thi ke hashar koi janta na tha

Bete ko baap khauf se pahchanta na tha

Perh kar rajaz ali-e-wali ka pisar barha

Goya shikar khelne ko sher-e-nar barha

Darya-e-qahar khaliq-e-jin-0-bashar barha

Bahar-e-nabard malik-e-fatah o zafar barha

Tarpa jo ruksh burq nigahon se gir gayee

Aamad khuda ke sher ki aankhon me phir gayee

Nikli idhar ghalaf se woh burq-e-shola raiz

Chalne mein zulfiqar thi jiski zabaan taiz

Chamke sharar bharakne lagi aatish-e-setez

Ghera ajal ne bund howay koocha-e-garez

Aaya khuda ka qahar har ik roosiyah per

Bijli moheet ho gayee sari sipah per

Chamki giri tarap ke kaleje hila gayee

Jo the hawa pe khaak mein un ko mila gayee

Bharki dilon mein aag woh paani pila gayee

Johur dikha ke fauj ko hira khila gayee

Dawa tha khoon-e-qasim-e-yosuf jamal ka

Yon taigh ne ewaz lia shabbar ke lal ka

Kha kha gaee safon ko barabar larai mein

Tehri na be lahoo piye dam bhar larai mein

Sabit rahe the jin ke qadam har larai mein

Pehle unhain ke kat gaee sir larai mein

Do tukre ho ke girta tha jo rahwar se

Ye uth ke daad mangti thi zulfiqar se

Jis ghol per giri na ruki na thami kaheen

Ik dam bhi ki na us ki brush ne kami kaheen

Chumki kaheen kisi ye kisi ja dami kaheen

Faujon mein ubtari thi kaheen burhami kaheen

Kaate howay nishan the zamin per pare howay

Hurja the zurb-e taigh ke jhunde gare howay

Jul jul ke aab-e-taigh se kuffaar murgae

Pis pis ke bhagne mein jafa kaar mergae

Nami the jitne sub woh namoodar mergae

Do hath jub idhar se chale chaar mergae

Ghul tha ke zalzale mein zamin aaj run ki hai

Kehta tha sher haan ye madad panjetan ki hai

Jub war chal gaya sipar aahneen kati

Dastana kut ke hath kata aasteen kati

Mughfar kata doneem howa sir jabeen kati

Seene ko le ke zeen se jo utri zameen kati

Chorung tha faras to doparah sawaar tha

Allah re moon ke taigh ne jana khiyar tha

Aai jidhar lahoo mein sara sar bhari hoee

Khali safoon mein aur siwa abtari hoee

Bejan tha jis pe saya figan woh pari hoee

Phirti thi saath saath ajal per dari hoee

Aanch us ki qahar thi koi kyon ker alag na jai

Chupti thi burq bhi ke hawa us ki lag na jai

Palti udhar se jub to idhar ka para na tha

Kaate the sirpe faraq bursh mein zara na tha

Chitka howa tha sum badan us ka hara na tha

Khoon sub ka pee gaee thi magar dum bhara na tha

Seel-e-fana tha jang mein kaat us ki dhar ka

Dum khum tha ghaat barh mein sub zulfiqar ka

Gora woh haath aur woh talwar ki chamak

Thi saaf taighg-e-haider-e-karar ki chamak

Mojoon pe aks dalti thi dhaar ki chamak

Us par tak pohanchti thi iss par ki chamak

Ik shor tha ke aag lagi kainaat mein

Bijli ghazab ki kond rahi hai farat mein

Barh barh ke chal rahi thi jo talwar char soo

Kushton ke barhte jaate the anbar char soo

Tha run mein garam maut ka bazar char soo

Phirta tha jhoom jhoom ke rahwar char soo

Taigh aai jis pe uss ka bhi waar uss pe chal gaya

Woh sir giragai to ye lasha kuchal gaya

Jub zarb ki zameen ke tabaq hill ke rahgae

Sir urgae galon se gale mill ke rahgae

Zakhmon ke phool char taraf khil ke rahgae

Bismil tarap ke samne bismil ke rahgae

Burham mizaj-e-lukht-e-dil-e-booturab tha

Lashe ulat gae ye naya inqilab tha

Har aik alam ki chob-e-zalalat nishan kati

Moon taigh ka kata to sina ki zaban kati

Turkush kate qalam howay neze sina kati

Tukre howay zirah kamar-e- pahalwan kati

Roohon ke sath tan the na roohain tanoo ke sath

Taare nafas bhi kut gaye the gardanon ke sath

Nari safoon mein jal gaye jub sholah wer hoee

Chumki idahr ye taigh tajalli udhar hoee

Shub ko chaman khila jo sipar khoon se tar hoee

Sir dhar se gir para na jasad ko khabar hoee

Chillai maut sadqe teri kuj adai ke

Boli nikal ke rooh nisar iss safai ke

Jis ke gale se mil ke chali mur ke rahgaya

Bismil bhi taigh-e-tez ka dum bhar ke rahgaya

Aage barha koee to koee dar ke rahgaya

Sakte mein koee moon pe nazar kerke rahgaya

Doo putlian bhi bahar-e-tamasha tuli raheen

Sir kut ke girpara magar aankhain khuli raheen

Iswar ko gira ke sanbhal ne na deti thi

Lakhoon mein hath aik ka chulne na deti thi

Barcheet ko pare se nikal ne na deti thi

Rustam bhi ho to taath badal ne na deti thi

Jo iss ka kaam tha soo who phurti ke sath tha

Jis ka qadam barha na sipar thi na haath tha

Utthi chali sipah mein aai juda hoee

Punja jo buch gaya to kalai juda hoee

Saff ki juda pare ki safai juda hoee

Peeri jigar mein khoon mein nahai juda hoee

Dum tore ya mare koi pervah zara na thi

Nikli jo khoon mein par ke phir aashna na thi

Allah re zalzala ke larazte the dusht o dar

Jangal mein chupte phirte the dar dar ke janwar

Jinnat kanp kanp ke kahte the alhazar

Duniya mein khaak urti hai ab jain hum kidhar

Andhair hai utthi burkat ab jehan se

Lo milgia zameen ka tabaq aasman se

Darya ki fauj ghaat se jub hut gai tamam

Sahil tak aai hazrat-e-abbas-e-naik nam

Narah kia tarai to sheron ka hai muqam

Woh zor shor kia howa aye sakinan-e-sham

Tum sub ki kia besaat hai daman ki gard ho

Haan ab hamain hattao to jane ke mard ho

Ye baat keh ke daal diya nahar mein samand

Taoos dum utha ke bana isp-e-sirbuland

Chumka jo aks-e-rooae alamdar-e-arjumand

Paani ki aab o taab hoi chand se dochand

Dariya ke dil mein thi jo kadoorat woh dhogai

Aankhon mein muchlioon ki chaka chond hogai

Boshar yak ba yak hoi teeron ki hai ghazab

Taighain chaleen aqab se shareeron ki hai ghazab

Ye shakal dojehan ke ameeron ki hai ghazab

Bujhne na pai pyaas sagheeron ki hai ghazab

Neze the aur chand se pehloo diler ke

Teeroon ne chan dala tha seene ko sher ke

Zakhmi the per faras ko dapat te the bar bar

Chehre pe zakham kha ke japhat te bar bar

Barh barh ke ghol fauj ke huthte the bar bar

Sir tan se panch saat ke kut te bar bar

Dikhla rahai the rung ali ki larai ka

Aada ke khoon se lal tha sabzah tarai ka

Jukhte alam ko rok ke kehte the bar bar

Quvvat atta karo mujhe ya sher-e-kirdigar

Dete the dum ba dum ye sada shah-e-zulfiqar

Beta tere thake howay bazoo ke mein nisar

Paani ke waste kabhi ye run para naheen

Kandhe pe mashk le ke koi yoon lara naheen

Dahna tha haath taigh usi mein thi hai sitam

Ab thamain bahain haath mein mashkiza ya alam

Tulwarain do chaleen jo kamin gah se baham

Uljah howa woh haath bhi hogaya qalam

Kis se hataian fauj ko kis se wigha karain

Batlao ab hazrat-e-abbas kya karain

Dar se qareen to aana saka koi nabkar

Par teer sub lagane lage bandh kar qatar

Ek teer lug ke mashk pe guzra jigar ke paar

Paani ke saath sine se choothi lahoo ki dhar

Hai hai sakina kah ke falak per nigah ki

Hurne pe sir patak ke bahishti ne aah ke

Gurz-e-sitam se shuq howa nagah sir-e-jinab

Thurrai honth chutt gai danton se mashk-e-aab

Furmaya hai dainge sakina ko kya jawab

Ghore se ther therra ke gire misil-e-aaftab

Turpe utthe karah ke khamoosh ho gaye

Moon rakh ke khali mashk pe be-hoosh ho gaye