Ek piyasa insan dariya dil insan

Aab e baqa ka sir chashma hai kausar ki hai jaan

Jaam e vila kay peenay walay jiski piyas pay marte hain

Jiski piyas ko sahil sahil sajday samandar kartay hain

Jiskay dariya deewanay hain aashiq hain toofan

Abr e rehmat baras raha hai jiski piyas kay sadqay mein

Sara jahan sairab hua hai jiski piyas kay sadqay mein

Aab e rawan kya aab e zum zum sab is per qurban

Pyas ney jiskay bal bootay per dariyaoon per raaj kiya

Mazloomon ko taqat bakhshi zalim ko mohtaj kiya

Jiski pyas kay sagar peer kar deen charha parwan

Jis piyasay kay naqsh e qadam bhi rehmat kay parnalay hain

Jiskay ek deedar pay qurban beenaee kay piyalay hain

Jiskay ishq mein dooba hua hai aaj talak quran

Behr e shujaat behr e sakhawat behr e ataat sab iskay

Ishq ki nadiyan husn kay jharnay chashma e rehmat sab iskay

Donon jahan ki her ek shey per jis ney kiya ahsan

Jiski pyas ney barhtay barhtay toofanon ko ghair liya

Zulm o sitam ki her sazish per pyas ney pani phair diya

Dasht e bala ko jis ney banaya zulm ka qabrustan

Kehtay hain shabbir usay aur shabber uska bhai hai

Khud yeh mohammad ka hai nawasa aur zainab maan jaaee hai

Maan zehra hai baap ali hai dada hai imran

Jiskay qadmon ki mitti say husn kay zaiwar bantay hain

Jiski pakeeza chokhat kay zarray gohar bantay hain