Kab koi bashar midhat e shabbir likhay hai

Aayat e inaayaat ki tafseer likhay hai

Shabbir badal sakte hain taqdeer ki tehreer

Yeh baat to khud katib e taqdeer likhay hai

Ek aisa likhari mera shabbir hai jo keh

Kirdar say quran ki tafseer likhay hai

Yeh raaz sir e karb o bala ho gaya zahir

Woh kaun hai jo khwab ki tabeer likhay hai

Allaha ray yeh haal gareeb ul watani ka

Her qafla e zeest tujhe meer likhay hai

Kya kehna teri chara gari ka ali asghar

Hans hans kay ilaj e dil e dilgeer likhay hai

Yeh moajza dekha hai faqat karb o bala mein

Bazoo hain qalam jiskay woh taqdeer likhay hai

So saal bhi likhyon to samjhyo yehi gohar

Tu pehlay pehel midhat e shabbir likhay hai