Khuda hafiz Sakina

Baba aajaao x2 Yeh beti jo, tumhe pyaari hai

Aaj ki raat Sakina pe, bohot bhaari hai

1) Aable dukhtey hain hoti hai, chubhan khaaron ki

Barhti jaati hai azeeyat merey, rukhsaaron ki

Yehi haalat, ba Khuda hoti hai beemaaron ki

Aisa lagta hai, ke marne ki yeh tayyaari hai

2) Apni jaanib, jo bulaati hai yeh zindaa(n) ki zameen

Yeh kahin aap se milne ka ishaara to nahin

Jald aajaayein, na hojaaye bas ab der kahin

Aap ke seene pe sone ki, meri baari hai

3) Itna saabir hai mera bhaayi, ke har dukh sehke

Khoon ke aansu ba har haal, theher jaate the

Haan magar maanga gaya jab se, kaneezi mein mujhe

Bhaayi Sajjad ki, aankhon se lahu jaari hai

4) Shimr ke durron, ne kardi hai kamar meri nidhaal

Merey baalon ki safedi se, ayaan hai mera haal

Ab mujhe dekh ke kartey hain, sabhi log sawaal

Zard chehra hai, kya is bachi ko beemaari hai

5) Pyaar hai beti se kitna yeh, bataanaa hoga

Saath mein saare, shaheedon ko bhi laana hoga

Pehla pursa mera leney tumhe, aana hoga

Aaj zindaa(n) mein, Sakina ki azadaari hai

6) Sochti hoon ke kafan kaise, mera laayenge

Kis tarha laash ko bhaiyya meri, dafnaayenge

Qaidi haathon se, mujhe kaise uthaa paayenge

Kaisi yeh maalik o mukhtar, ki laachaari hai

7) Khaak par thakk ke jo bethi to, tamaachey khaaye

Haaye Abbas pukaari to, tamaachey khaaye

Aap ke naam pe royi to, tamaachey khaaye

Merey rukhsaaron pe tafseel, likhi saari hai

8) Baap ko beti sada deke, yeh boli Akbar

Kardiye baazu nisaar apne, chacha ne mujh par

Uthega unka alam mashk e, Sakina lekar

Wo wafa unki thi, yeh meri wafadaari hai

Aaj ki raat Sakina pe bohot bhaari hai